Вязанне, або crazy knitting

Вітаю!

Цяпер такі час, што на сняданкі часу няма: устаю, пакуль муж спіць адкрываю птаства-цяпліцы, кармлю, потым іду палоць. Між гэтымі справамі з'ядаю яблык ці ёгурт з бананам.

Прачынаецца муж у той час, як я ўжо снедаю чым-небудзь простым, бо часу, каб прыгатаваць есці, няма. І пакуль спёка на вуліцы, вучуся, кармлю мужа, прыбіраю хату. Ніякай рамантыкі апошні час :( Нават стол і стульчыкі для вуліцы засталіся ў бацькоў, няма за чым есці на вуліцы, а так хочацца.

Таму каб не было сумна, выкладаю сваё вялікае вязанне :)

Чаму crazy knitting? Таму што пакуль я вязала з мяне муж пасмейваўся, але потым, як скончыла, то вельмі здзівіўся :)

Ніткі Moorland aran 375 ад кампаніі King Cole.
Вязала адным кавалкам, каля метру даўжынёй. А потым сшывала.

 Вязала яшчэ ў снежні 2014, але вось выкласці рукі не даходзілі...

Атрымалася вельмі зручная коўдра-швэдар. Вельмі цёплая і мяккая. Больш я ня мерзну, ні разу пасля таго, як звязала :) паўсюль са мною гэтая прыгажосць :)

Прыемнага вязання і цеплыні :)

І смачных сняданкаў!

Кармлю куранят :)

Вітаю!

Вось так я кармлю кур: пакуль выкладаю ежу, на спіне ўжо сядзіць не адна парачка куранятак :) А тут пакуль адзін: першы разведвае ці буду скідаць яго, ці не. Асабліва так заскокваюць, калі халадно. Звычайна проста лезуць у вядро з ежай :)

Цудоўных выходных :)

Качкі індыйскі бегунок

Як часта бывае, у нас штосьці прападае. І ў такія моманты з'яўляецца хтосьці, хто выпраўляе такую сітуацыю :)

Пра надвор'е

Учора а дзевятай вечара прыйшлі з мужам з гароду. Добра, што паспелі ўсё птаства загнаць у курнік, закрыць плёнкай расаду...

І толькі зайшлі ў хату, як пачаў "барабаніць" у шыбы, крышу град. Такім памерам быў, як яйка галубоў. Проста жах! І страшна. Нават сабака спачатку лавіў гэты град, а потым заскавытаў і схаваўся ў сені :)

А потым была навальніца і проста дождж да самай раніцы, два разы знікала святло, думала ісці ўжо пад дождж мыцца пасля гароду :)
А наш Тор як толькі пачуў гром, пачынаў на яго брахаць :) Так смешна :)
І вось сёння ўвесь дзень ідзе дождж, куры сядзяць у курніку, а вось маленькія качаняткі не паспелі схавацца, змоклі і адзін сдох :( А аднаго паспела адагрэць, цяпер носіцца па хаце, не злавіць.
Абяцаюць цяпло, хутчэй бы ўжо, а то вельмі сумна ад такога надвор'я.
Пайду, прыгатую што-небудзь смачнае, раз так :)

А якое ў Вас надвор'е?

Макароны з брокалі, або на вуліцы дождж

Вітаю!
Апошнія тыдні працы на гародзе праходзяць незаўважна: ад цямна да цямна :) Калі можна так сказаць. Але вельмі заўважна для майго мужа, бо перабіваецца чалавек з хлеба на ваду. Добра, што хлеб хатні, іначай увогуле сумна было.
І вельмі ён радуецца, калі надвор'е псуецца, тады ёсць што есці, смачна і ўтульна ў хаце.
Вось у такі дзень і былі прыгатаваны макароны з брокалі, вельмі проста, лёгка і смачна.




Асаблівага рэцэпту няма, проста адварыць замарожаную брокалі, падсушыць на патэльні з лыжкай аліўкавага алею. Тым часам адварыць макароны, дадаць да брокалі, дадаць тварожны сыр. У маім выпадку гэта была рыкота. Перамяшаць і можна частавацца :)
Смачна есці!

А ў нас дождж працягваецца, а значыць будзе яшчэ штосьці смачнае :)

Цудоўнага настрою!

Хатняе марозіва

Вітаю!

Вось бывае так, што ў лядоўні штосьці прападае, і ў выніку з гэтага атрымліваецца вельмі смачная страва, якая і стварае настрой :) Так і сёння, у нас прападалі вяршкі, вось звычайныя такія вяршкі 32% тлустасці. Стаялі яны і сумавалі, пакуль я пра іх не ўзгадала... Так і атрымалася марозіва. Калі ласка!

Увогуле быў спачатку рэцэпт марозіва з кнігі, але аказалася, што паловы таго, што трэба няма, а ёсць толькі вяршкі. Таму марозіва гатавалася "на вока", як звычайна ў мяне :)

Што і як:

• 2 шклянкі вяршкоў 32% тлустасці (кожная па 300 г);
• карычневы цукар - 100 г;
• крухмал кукурузы - 10 г;
• ваніль.

Адну шклянку вяршкоў пакінуць у лядоўні. Другую падзяліць на дзве часткі: адну змяшаць з крухмалам, каб не было камячкоў. Другую змяшаць з цукрам і паставіць на пліту, пастаянна перамешваць і давесці да моманту, калі пачне кіпець. Дадаць вяршкі з крушмалам і хутка-хутка перамяшаць, каб крухмал заварыўся і вяршкі загусцелі.

Так было ў рэцэпце, а я пабаялася, што вяршкі "збягуцца", таму проста грэла вяршкі, пакуль цукар не растварыўся. Дадала вяршкі з крухмалам і заварыла гэты кісель, пастаянна перамешваючы. Пакінула астываць.

Затым, як гэты кісель астыў, узбіла другую частку вяршкоў у густую пену, дадала кісель, перамяшала і паставіла ў маразілку, і перамешвала кожныя 30 хв. першыя пару гадзін.

Канешне, калі ёсць прылада рабіць марозіва, то прасцей. Я перамешвала сама.

І праз некалькі гадзін можна ласавацца :) З ягадамі вельмі смачна, асабліва, калі шмат ягад, бо марозіва атрымліваецца вельмі тлустым. У наступны раз буду рабіць з малаком, як напісана ў рэцэпце.

Але гэтае марозіва атрымалася вельмі добрай альтэрнатывай марозіву з крамы, якое мы ня вельмі паважаем :))) Таму запрашаю на марозіва, тым больш, што хутка будуць свежыя ягады.

Смачнага марозіва і цудоўнага настрою :)

А мы ізноў на шпацыр :)

Вітаю-вітаю!

Як толькі субота, то мы ня толькі смачна снедаем, але і ходзім гуляць у лес. Справы па трошкі робяцца, і застаецца час для шпацыру. Таму запрашаю :) Слоў мала, а фотаздымкаў шмат...

 Тор адкрыў купальны сезон :)

Сам, сам Тор, наш маленькі баязлівец палез у ваду, паплаваў, а потым не прапускаў ні адной лужыны. Так яму спадабаляся :)

Як толькі залез у ваду, мы не маглі зразумець, куды наш сябра паплыў :)

Хацеў на іншы бераг пераплысці, але вырашыў не кідаць нас тут і вярнуўся назад.

Называецца "Знайдзіце Тора" :)

Сасна

Брусніцы

Камвалея лесавая, або проста ландыш

Купена

Блюшчык плюшчападобны

Вераніка дубраўная

Браткі, або фіялка трохкаляровая

Добрага настрою і прыемнага шпацыру :)

Смажаная качка з гароднінай, або мясцовы сняданак суботы

Вітаю!

У нас сёння быў вельмі позні сняданак: каля трох гадзін дня :) Справа ў тым, што хадзілі ў лес на шпацыр, потым вырашана было смажыць мяса, а значыць трэба раскласці вогнішча. Вось так і зацягнулася, але мы не галадалі, мы снедалі ў першы сняданак садавінай, пакуль гулялі па лесе. Бралі з сабою яблыкі, грушы, бананы. Таму што хтосьці спаў, а хтосьці суніцы палоў з васьмі раніцы :)

А вось на сняданак-абед: смажаная качка з гароднінай. Калі ласка!

Канешне, хатняе мяса не ідзе ў параўнанне з мясам крамы. Тым больш што гэта качыная грудка. Зусім іншы смак :)

Рабіла вельмі цікавы марынад:

• дзве качыныя грудкі парэзаць на кавалкі;
• адзін вялікі аранжык (сцерці цэдру і выціснуць сок);
• адна зорка бадзьяну (змалоць);
• 1 ч.л. з горкай цынамону;
• 1-2 ст.л. мёду.

Марынаваць ноч у лядоўні. Затым смажыць са свежымі грыбамі і памідорамі.

Атрымліваецца незвычайна! Вельмі сакавітае, мяккае і проста нерэальна смачнае мяса. 

Гэты марынад падыходзіць толькі для качкі.

Пра іншае мяса напішу як будзем смажыць :)

Смачных выходных :)

Сезон смажанага мяса адкрыты!

Быў хлеб, будуць аладкі

Вось так звычайна, толькі пяку хлеб, застаецца закваска і стрымацца, каб не напекчы тоўстых, духмяных аладак немагчыма :)

Раблю проста і "на вока":

• да закваскі дадаю два-тры хатнія яйкі
• каля 0,5 л хатняга малака
• мукі столькі, каб было густаватае цеста
• пакідаю на ноч, каб закваска пачала працаваць (у лядоўні, іначай перакісне)
• і раніцай можна пекчы такіх пузанчыкаў :)

Мы любім есці са смятанай, варэннем, калі ёсць тварог, то з тварагом і мёдам.

Вельмі смачна! І водар хлеба лятае па хаце, і пахне нейкай утульнасцю ад гэтага :) Ці не так?!

Смачна есці і цудоўных выходных :))))

А ўжо яны хутка!

Толькі з печы

Як звычайна, вада, мука і соль у белы хлеб...

Вада, мука, соль, мёд, кмен, лён, насенне гарбуза і сланечніку ў чорны :)

Смачна есці і цудоўнага настрою :)

Мроі, мроі, мроі, або маленькі цуд

Пакуль мыю посуд, назіраю за Торам. На яго мордачцы адлюстроўваюцца розныя пачуцці, так цікава гэта. Тут ён пра штосьці марыць, магчыма ўзгадвае свае былыя падарожжы, або ўзгадвае Лайму, бо даўно не бачыў. Або проста плануе свае справы :) 

Як добра, што Тор ёсць, ён - гэта маленькі цуд прыроды... Вялікі, ласкавы, бясстрашны і моцны.

I am washing dishes and watching Tor. His "face" shows emotions and it's interesting. Sometimes he dreams, maybe recalls his journeys from the past, or Laima, as he didn't see her for a while. Or maybe he's making plans :)

It's so fine that Tor exists, he is a little wonder... A big, tender, fearless and strong.

Цудаў і цудоўнага настрою :)

I wish you wonders and wonderful mood :)

Вясёлкі, або надвор'е такое не пастаяннае :)

Вясна - гэта здорава, прыгожа, але пакуль ня вельмі цёпла.

І надвор'е такое не прадказальнае, што дзіву даешся. Вось толькі дзьмуў моцны вецер, але свяціла сонейка. І раптам надышлі хмары, усё сцямнела і паліло як з вядра. Як так?! 

А я ў гэты час у гародзе, лаўлю малых куранятак :))) І толькі я ўсіх схавала, як дождж скончыўся. І такія фантастычныя дзве вясёлкі зайгралі на небе.
Пакуль я збегала за фотаапаратам, дык адна амаль схавалася.

І так дзіўна назіраць: перад сабой бачыш вельмі яркую вясёлку на шэрым небе...

А ззаду зіхаціць сонейка :) Так прыгожа!

Сонейка перамагае :) Дай Бог, каб было цяпло, так гэтага не хапае...

Цудоўнага настрою і цеплыні :)))

Тор чакае гасцей

Вітаю!

Вось так Тор праводзіць свае дні: гэтыя вароты выходзяць на дарогу, там час ад часу едуць машыны, ходзяць людзі, і сабаку цікава назіраць за ўсім гэтым. Так і адпачывае, і працуе наш галоўны ахоўнік. Ён як бы тут, і як бы там, носам :) Freedom!

Цяпла і сонейка :)

Качкі, вакол адныя качкі :)

Вітаю!

Вось апошнія дні качкі мне ўжо сняцца :) Вакол мяне яны і маленькія, і вялікія, і ўсіх трэба карміць і шкадаваць. І вось так яны ў маім жыцці занялі галоўнае месца ў апошнія пару тыдняў. Але за дабрыню і пяшчоту дораць тым жа, не баяцца і больш не шкодзяць кветкам і расадзе, што важна :))))

Лёгкага працоўнага тыдню і цяпла, яго так не хапае :)

Калі свята кожны дзень...

Вітаю!

Вось бывае так, што прачынаешся раніцай, а настрой ужо святочны проста так...

Гатуеш сняданак, звычайную кашу з яйкам і тварагом, а настрой паляпшаецца, таму што свята ў душы проста так...

Едзеш у горад па справах, набываеш прадукты, а настрой яшчэ паляпшаецца, таму што час ідзе. І час падыходзіць да сустрэчы са сваякамі. А якая сустрэча праходзіць без чагосьці смачнага?! У нас не праходзіць :) Таму вырашана было купіць кавун, рызыка вялікая, канешне, але гэта таго каштавала: кавун з Ірану, салодкі, сакавіты і такі водар, ммммм... Вось яно, лета, амаль пачалося :)

Смачнай садавіны і цудоўных выходных :)

Вясёлка

Цудоўнага дню :)

Як пачынаецца раніца...

Добрай раніцы, калі Вы толькі што завіталі!

Як пачынаецца Вашая раніца? 

Мая пачынаецца каля 6, калі пашанцуе :) Бывае і раней, вітае ўсіх малявак птаства-качаняства. Затым Тора, дарослых птушак. І потым, у вельмі смачным варыянце, заканчваецца так...

Запрашаю :)

Рэцэпт - імправізацыя, каб атрымаць больш лёгкую страву, чым на сметанковым масле. І сказаць па праўдзе, я да канца не была ўпэўнена, што атрымаецца смачна, але атрымалася. Таму раю прыгатаваць :)



Што і як (ізноў жа, усё на вока, бо ў такія хвіліны не да ўзважвання :):

• 5 яек (курачкі радуюць такімі смачнымі яйкамі!);
• 0,5 шклянкі карычневага цукру (шклянка каля 200 г, можа меньш), калі любіце больш салодкае, то кладзіце поўную шклянку. Я люблю есці з мёдам, муж з варэннем, таму нам салодкасць ня грае значэння. Я кладу толькі пару лыжак;
• 450 г смятаны (тлустасць ня мае значэнне, у мяне была 23%);
• 0,5 ч.л. пітной соды;
• аўсяная мука: я дадавала каля 4-5 шклянак. Трэба глядзець, калі смятана больш вадкая, то трэба больш. Але трэба памятаць, што мука набухне, і галоўнае не дадаць, чым перабольшыць.
• пара галінак сушанага размарыну для водару, можна замяніць ваніллю, мускатам ці цэдрай цытрусавых. У мяне заставаўся апошні сушаны размарын са свайго садку, даў тут прыемную духмянасць :)
• разынкі. У мяне былі замочаныя ў віне, некалькі штук. Больш як сюрпрыз :)
• некалькі сталовых лыжак аліўкавага алею дадаць у цеста, каб пры смажанні не прыліпала да формы. І можна пекчы!

А пазней і ласавацца :)

Я, як і пісала, люблю з мёдам, але гэты мёд дадаю ў хатні тваражок, а затым усю гэтую смакату дадаю да вафляў, можна есці проста з варэннем і смятанай, або з садавінай-ягадамі. Добра тое, што ёсць пад рукой :)

А калі не дадаваць разынкі і цукар, то атрымаюцца вафлі-хлябцы, якія можна выкарыстаць у бутэрбродах з салёнай рыбай, тварожным сырам і свежым памідорам-гурком. Або з кавалкам печанага мяса і міксам са свежага зяленіва. Галоўнае не ленавацца :) І смачны сняданак гарантаваны!

Смачных сняданкаў і ўсмешак :)

Суботні шпацыр

Вітаю!

Прыемна так перад сняданкам схадзіць у лясок, нагуляць апетыт :)

Тым больш, што наваколле такое прыгожае, так усё пачынае квітнець, прыгажэць. Што тут скажаш, гэта трэба бачыць...

Садок на месцы старой хаты

Ад хаты засталіся толькі камяні і разваленыя сараі, а вось тое, што стварае прырода, пастаяна. І толькі чалавек гэтую прыроду сапсаваць.

Беражыце прыроду, бо мы толькі яе невялікая частка...

У садку цвітуць яблыні, грушы...

Прыгожа з дарогі выглядае гэтае месца. Вось і захацелася падысці і пагледзець, што там такое цвіце і адкуль узялося.

Прыгожа, ці не так?

І першыя грыбы, шкада што нельга есці :)

Лясная фіалка

Такая маленькая, што не адразу і заўважыш, а калі заўважаеш, то адкрываецца такое хараство, што цяжка паверыць, што гэта нашая прырода так пастаралася. Непатрэбны архідэі і  іншая экзотыка, дастаткова проста завітаць у лес...

Чарнічнік

Павінна быць шмат ягад, калі не будзе моцнай спёкі.

У мінулым годзе было вельмі мала чарніц у нас, назбіралі толькі паесці,

а вось да аўсянкі на сняданак намарозіць не хапіла :(

Думаю, што гэтым годам выправім такую сітуацыю :)

Усю зімку агромістыя лесавозы вазілі дрэвы, сапсавалі дарогі. 

Вось як гэта выглядае...

Добрая лужа для Тора, адзіная радасць ад іхняй працы...

Але лес вельмі сапсавалі, амаль праз кожныя 20 м у лесе нейкія крывыя дарогі.

І гэта ў месцах, дзе былі шыкоўныя ягаднікі і грыбніцы. Шмат дрэў нейкіх пакарэжаных, шмат тоўстых галін проста валяецца.

Сэрца проста рвалася на часткі ад такога!!!

Ці можна так?

І столькі смецця ў лесе пасля гэтых працаўнікоў, што хадзі і збірай замест грыбоў.

Я проста не разумею такіх людзей: у лес нёс поўную бутэльку, пакунак прысмакаў, гэта ж цяжэй, чым забраць назад пустое.

Але ж  не, усё застаецца бездапаможнай прыродзе. Яна не паскардзіцца і не адпомсціць.

І гэта вельмі вялікая шкода, бо такое смецце доўга не гніе, а значыць жывёлы могуць праглынуць які цалафан, ці, як наш Тор, парэзаць лапы бітымі шклянкамі...

Гэта проста нейкія дзікія людзі, не выхаваныя і не зусім разумныя. Іначай і не прыдумаеш.

Лятае шмат матылькоў, такія незвычайныя колеры :)

Шкада, што складана сфатаграфаваць, так хутка лятаюць і не сядзяць на месцы.

Вось толькі адзін сеў на руку, але не раскрыў крылаў. Блакітны.

Гэта працяг садку, калі вярталіся назад.

Нейкія кусты, прыгожыя кветкі будуць.

Хачу каля хаты іх пасадзіць.

Яблыня

У нас каля хаты толькі лісце з'яўляецца, а там ужо кветкі зацвітаюць.

Прыгожа, што тут скажаш :)

Груша

Ды столькі пчол на ёй, дрэва гудзе ў прамым сэнсе :)

Чаромуха

Якраз каля гэтага месца сустрэлі ядавітага гада :) І я пабегла, скачучы з нагі на нагу, было не да фотаздымкаў, было страшна...

У самым канцы нашага невялічкага падарожжа была вось такая дарога.

Прыгожа, па вясковаму проста і неяк утульна ад гэтага.

Ня ведаю чаму...

Каля суседняга дому расце вось гэтая прыгажуня чаромуха.

Прыемны водар даносіцца і да нас. 

Асабліва пасля дажджу паветра было насычана рознымі пахамі: кветак, зямлі, лісця. 

Нібы газаваны напой, гэтыя пахі ўзрываліся ў носе маленькімі бурбалкамі.

І пачуццё такое, што не дыхаеш, а п'еш гэтае паветра. І яно пачынае цячы паўсюль унутры. 

І становіцца вельмі лёгка, вельмі радасна. І нібы крылы вырастаюць...

І паляцеў бы куды-небудзь, проста для таго, каб вярнуцца назад.

Бо тут добра і казачна, часам складана, але пасля адпачынку, як пасля дажджу, дыхаецца іначай. І зусім іншыя думкі і адчуванні :)

Адпачывайце, каб жыццё было весялейшым :)))

Цёплага надвор'я і магчымасці адпачыць :)