Хатні ёгурт з садавінай (мясцовы сняданак суботы)

Вітаю-вітаю!

Апошні час сняданкі сталі вельмі разнастайнымі і смачнымі :) І карыснымі, як учарашні сняданак: хатні ёгурт з яблыкам, хурмой, вотруб'ем з аўса, гарэхамі і мёдам...
Прасцей не прыдумаеш!



І новая прычоска :) Ужо некалькі разоў я вяртаюся да яе пасля вяселля... Напэўна гэта так надвор'е ўплывае. Толькі становіцца больш цёпла, як адразу хочацца вясны, расады :) лёгкіх спадніц, сакавітых салатаў, новай прычоскі... Але пакуль толькі студзень вось-вось перайшоў за сярэдзіну. І што будзе далей?! Не зразумела.

Добрага надвор'я і цудоўнага настрою :)

І прыгожых прычосак :)

Пра сняданак, або ўражанні дню (чацвер, кастрычнік-30-2014)

Вітаю!
Вось чаму сняданак можа так уплываць на настрой?
Здавалася бы што гэта проста ежа, але ад колераў гэтай ежы залежыць ці будзе дзень такім жа сонечным. як аранжавы сок з апельсінаў...
І ці будзе дзень такі ж насычаны творчымі "смакамі", як насычана аўсянка з брусніцамі, прарошчанымі грэчкай і пшаніцай і мёдам?
І ці будзе штосьці пікантнае ў дні, як саланаваты смак козяга сыру ў такім адносна салодкім сняданку?
Вось у мяне ад сняданку вельмі многае залежыць у дні. Які "зарад" атрымаеш, так і папрацуеш...

Вось мой сняданак і дорыць творчы настрой, сонечнае надвор'е і насычэнне...
Парасткі пшаніцы маюць вельмі прыемны пах, сакавітасць і мяккасць. Праросткі грэчкі ўвогуле вельмі цікавы для мяне прадукт. Раней я дадавала проста зялёную грэчку ў ёгурт, але есці такое было складана :) А вось прарошчанае зерне вельмі мяккае, смачнае, свежае.
І вельмі падыходзіць да цёплай аўсянкі з брусніцамі. Вітаміны, што тут яшчэ сказаць. Ну і прыгажосць :)



І вось сяджу я цяпер, пішу пра сняданак і ем хатні ёгурт з той жа прарошчанай пшаніцай і грэчкай, і смачна мне, і прыемна. І адчуваю сябе вельмі добра, таму што гэта карысна :) Прачытала, што прарошчаная пшаніца вельмі добра ўплывае на зрок.
А што Вы думаеце пра гэта?

Смачных і карысных сняданкаў!

Печыва з гарэхам пекан, натуральны ёгурт і хлеб з інжырам (Мясцовы сняданак суботы)

Вітаю!

Ізноў я спазняюся са сваім аповедам, ізноў у мяне паездкі. Але я ізноў тут, і тут мой сняданак суботы. Калі ласка :)

Звычайна на сняданак я раблю ёгурт з талакном з расткоў пшаніцы, зялёнай грэчкай, пшанічным, іржаным і аўсяным вотруб'ем (дадаю па 1 ч.л. на баначку 170 г ёгурту) і садавінай.

А да гарбаты было печыва з гарэхам пекан. Якое яно атрымалася смачным і духмяным, гарэхі маюць лёгкі саладкавы водар, які нагадвае цынамон...

Для цеста:

• 175 г сметанковага масла
• 250 г мукі
• 60 г аўсянай мукі
• 1 ч.л. пітной соды
• 1/2 ч.л. солі
• 125 г цукру
• 80 г гарэхаў пекан, паламаць на кавалкі

Перад тым, як рабіць цесца, неабходна ўключыць духоўку на 180 градусаў С. Узяць квадратную або прамавугольную форму, прысыпаць яе мукой.

Сметанковае масла парэзаць на кавалкі, змяшаць з мукой, содай, соллю, цукрам і расцерці ў крошкі. Дадаць гарэхі і замясіць цеста.

Затым выкласці цеста ў форму, выраўняць верх лыжкай і паставіць у лядоўню на 20 хвілін.

Пекчы 30-40 хвілін. Пасля таго, як астыне, парэзаць на кавалкі.

І можна частавацца...

А яшчэ быў спечаны з вечара хлеб з інжырам і барбарысам, гэта фаварыт для мяне сарод хлябом. Такі атрымліваецца смачны! Адным ім магу снедаць і вячэраць. Атрымалася буханачка на 1,5 кг. Шкада, што хутка скончыўся, пайду яшчэ пекчы...

Лёгкага працоўнага тыдню і цудоўнага настрою :)

Хатні ёгурт. МК

Усім прывітанне!
Сёння я прапаноўваю Вам смачную і карысную страву: хатні ёгурт. Толькі натуральныя часткі ніякіх загушчальнікаў, стабілізатараў і араматызатараў :) Запрашаю!

Трошкі тэорыі:

1. Малако.

• Калі малако з крамы, яно мусіць быць свежым. Зручна тое, што малако можна адразу змешваць з закваскай (пра яе пазней) і заліваць у слоічкі. Не абавязкова падаграваць. Мінус гэтага варыянта ў тым, што ёгурт атрымліваецца не такім густым. Канешне, і не такім карысным, як з хатняга малака.
• Хатняе малако таксама павінна быць свежым у іншым выпадку зварыце тварог. Яго трэба падагрэць, амаль закіпяціць. Я рабіла і без падагрэву, атрымалася ня вельмі смачна, быў пах не ёгурту, а нібы кіслага малака. Пасля таго, як малако закіпела, трэба даць яму час астыць, каб было трошкі цёплым. Калі малако будзе гарачым, то бактэрыі закваскі проста зварацца і ня будуць працаваць.

2. Закваска.

• Закваску можна набыць у аптэцы. Ёсць шмат розных варыянтаў сухой закваскі для ёгурта, кефіра. На ўсякі густ.
• Я карыстаюся, на мой погляд, сама простым варыянтам. Для першай закваскі я выкарыстоўваю ёгурт з крамы, у якім няма ніякіх штучных дабавак. Часцей за ўсё гэта простая "Акцівія", ёгурты для дзетак, некаторыя ёгурты ад "Беллакта" (гэта не рэклама, гэта ўжо свой вопыт). Пасля таго, як атрымаўся свой ёгурт, я пакідаю адзін слоічак для новай партыі :) І так кожны раз.

3. Як рабіць ёгурт? Ёсць тры варыянты.

• Мая мама, я памятаю з дзяцінства, рабіла ёгурт у звычайнай каструльцы. Залівала 1 л цёплага малака, дадавала 1 ст. л. ёгурта з крамы, перамешвала, закутвала каструльку рознымі рушнічкамі, каб цяпло трымалася. І праз 7 гадзін мы ўжо маглі есці ёгурт з ягадамі, варэннем, мёдзікам. 

Такім варыянтам спачатку я сама карысталася, пакуль не зварылася закваска ў гарачым малацэ. Ну ня вельмі зручна кутаць гэтую каструльку :)

• Пасля некалькіх няўдалых спробаў зрабіць ёгурт, я пачала выкарыстоўваць духоўку. Добра, што там можна выставіць тэмпературу 40 градусаў. Тыя ж самыя дзеянні: падаграем малако, студзім, дадаем закваску, ставім у духоўку на 7 гадзін, затым у лядоўню (холодильник). І можна есці ёгурт.

Нязручна тут тое, што 7 гадзін нельга карыстацца духоўкай. Можна, канешне, ставіць на ноч... Але мне і гэта было ня вельмі зручна :)

• Пасля доўгіх роздумаў я не за тое, каб кухня ламілася ад розных печак, грыляў, міксераў і розных модных штук, якіх заўтра зменяць больш модныя і наварочаныя было прынята рашэнне купіць ёгуртніцу. Аказалася, што рабіць ёгурт у ёй вельмі зручна ( гэта толькі маё меркаванне, не рэклама :) Заліў у слоічкі малако, перамяшаў з закваскай і пакінуў на 7 гадзін. Адзінае, што я хацела бы мець у сваёй ёгуртніцы - таймер. Але і так, як ёсць, зручна, стаўлю напамін на тэлефоне і пайшла па справах.

Ну што, тэорыя скончылася. Цяпер прапаноўваю пагледзець, як я раблю свой ёгурт.

1. Спачатку падрыхтоўваю ёгуртніцу, закваску і біфідабактэрыі. 

2. Раскладваю па слоічках закваску, па 2 ч.л. на слоічак атрымліваецца.

3. Бактэрыі набыла ў аптэцы. Там напісана разводзіць цёпленькай вадой і прымаць па 1 ч.л. Я проста дадаю бактэрыі адразу ў закваску. Дзялю адзін бутылёк на 7 слоічкаў з закваскай.

Розніца, канешне, у ёгурце будзе. Ён становіцца больш густым і больш малочным, калі можна так сказаць. Вельмі падобны на кефір, які шмат год таму прадавалі яшчэ ў шкляных бутэльках, і крышачка на іх была з фальгі. Вось тут і атрымліваецца такі малочны смак, а ёгурт больш густы, у параўнанні з ёгуртам без бактэрый :)

4. Калі малако астыла, здымаю плёначкі, якія ўтварыліся зверху і разліваю па слоічках.

5. Перамешваю лыжкай малако і закваску.

6. Накрываю ёгуртніцу крышкай і ўключаю.

7. Засталося толькі паставіць напамін, і можна займацца хатнімі справамі.

8. Праз 7 гадзін была ўжо ноч, таму толькі такія фотаздымкі.

Баначкі з ёгуртам стаўлю ў лядоўню, каб ёгурт не перакіс. І на сняданак можна ласавацца смачным ёгуртам :)

Далей ёсць яшчэ адзін нюанс, пра які я хачу расказаць. Я ёгурт выкладваю ў друшлячок на рушнік, каб сцякла сываратка. Тады атрымліваецца такі густы ёгурт, нібы тваражок, толькі больш мяккі і без крупінак.

На фотаздымку, бачна, што адзін слоічак застаўся. Гэта закваска на наступны раз.

Вось бачна, што сыраватка сцякла. Можна трымаць і больш. Атрымаецца ўвогуле тварожны крэм. Але мне больш падабаецца, калі ёгурт атрымліваецца ёгуртам, а не зусім сухім тваражком :)

Далей раблю начынне да ёгурта. Тут яшчэ прасцей, сёння ў мяне марожаныя чарніцы з бананам.

Пакуль чарніцы таюць, з ёгурта сцякае сыраватка.

Затым блэндэр дапамагае мне ператварыць ягады і банан у пюрэ. І можна есці! Прыемнага апетыту :)

Дадаваць можна пюрэ з ягадаў, садавіны, варэнне, мёдзік. Думаю, што летам буду дадаваць свежыя базілік, пятрушачку, кроп, рукалу - каб можна было ўсё намазваць на хлеб.

Можна, канешне, не сцэжваць сыраватку, таму што ёгурт і так атрымліваецца вельмі густым. Тут усё залежыць ад густаў, як каму падабаецца.

Смачна есці!