Качкі (агляд гаспадаркі)

Вітаю!
Качаняткі растуць, шкада толькі, што бегункі такія шпаркія, што не паспяваю іх фатаграфаваць, а вось пекіначкі - калі ласка, павольна ходзяць, спакойненька сядзяць, самыя найлепшыя мадэлі :)

Качаняткі-пекінкі...

Пекінкі так смешна ходзяць, перавальваючыся з нагі на нагу, ганяюць нават дарослых кур ад ежы, такія глаўнюкі-курнікі.

Мае прыгажулі-бегункі (дарослыя)...

Дзве качкі-бегункі сядзелі на яйках і нічога не атрымалася ў іх. Тэадор сумаваў, бедны, а цяпер так выленяў, так папрыгажэў, кавалер у самым росквіце...

І такія мордачкі ў іх - з усмешкамі, так прыемна назіраць за імі...

А вось і курыца-бройлер, два з паловай месяцы.

З-за розных прычын і дапамогі Торушкі з пятнаццаці (15) засталося толькі сем (7) кур.

Жывоцікі чухаю ім як і раней, вельмі любяць :)

А вось і гонар майго птаства - певень Чэрчыль.

Такі адважны! Да нас тут зачасціла дзікая драпежная птушка. Хоць зверху ўвесь загон, дзе знаходзіцца птаства, закрыты сеткай, і птушка ніяк не заляціць, шуму і страху яна наводзіць шмат. І вось у такія моманты певень падымае трывогу, усе куры-качкі хаваюцца, а ён, Чэрчыль, застаецца адзін на адзін. Крычыць і не збягае, і тут бягу я і праганяю гэтую птушку. І ўсё добра заканчваецца :)

Ёсць, канешне, яшчэ адзін певень, але той, як толькі чуе небяспеку, першым уцякае ў хатку і адтуль "дапамагае" сваім крыкам. Усё ж дапамагае, галосіць...

А певень Чэрчыль потым ходзіць героем.

Ну вось так і жывем :)

Сонечных выходных!