Вітаю!
Як я пісала раней, я вельмі люблю сняданкі суботы, яны такія павольныя...
І вось мінулая субота, апошняя субота каляндарнай вясны, атрымалася вельмі смачнай!
Бліны - аладкі...
І хатні пшанічны хлеб: мука, вада і соль...
Спачатку раскажу, як усё пачыналася. Як Вы ўжо ведаеце, я карыстаюся кнігай "Вуліца свежага хлеба" (тут таксама пра яе). Гэта не рэклама, а проста шыкоўная кніга :))) Вось я з яе пяку і хвалю яе. Дык вось, там падрабязна напісана як вырошчваць закваску, як пекчы хлеб. І вось я тры тыдні вырошчвала закваску...
Калі правільна ўсё рабіць, то закваска атрымліваецца моцнай. Адзінае, што мяне засмучала, напрыканцы кожнага тыдню неабходна было выкідаць частку закваскі, таму што яна ня вельмі актыўная для цеста на хлеб. Дык шкада выкідаць, мука-та вельмі дарагая, таму што са звычайнай беларускай мукі закваска не працуе, або літоўская, або расейская.
Таму я пякла аладкі. Да закваскі (звычайна гэты 500-600 г) дадавала 2 ст.л. аўсянай мукі і 2 ч.л. карычневага цукру. І вось яны, такія пухлякі, з'ядаліся на сняданак з варэннем і смятанкай.
Мяне вельмі ўразіла праца з цестам на заквасцы. Гэта проста нейкі цуд!
Спачатку змешваецца закваска, мука і вада. Цеста атрымліваецца вельмі ліпкім, і нязручна яго мясіць...
Але яго трэба мясіць хвілін 20-30...
І вось тут адбываецца магія вады і мукі, цеста становіцца мяккім, пузырыкі паветра шчоўкаюць пад рукамі. І цеста больш ня ліпне да рук, яно становіцца паслухмяным, пачынае расці.
Неабходна ў гэты момант пакінуць яго на 20 хвілін адпачыць. Затым дадаць соль і працягваць яшчэ мясіць хвілін 20.
Такое цеста не падобнае ні на адно іншае, у яго кіславаты пах, пузырыстая мяккая структура, адразу адчуваецца рукамі рост цеста "тут і цяпер"...
Я пякла проста пшанічны хлеб, спельтавы хлеб. І вось вырашыла дадаць да хлеба ягады сушанага барбарысу. Яны далі прыемную кіслінку хлебу. Буду шукаць новыя смакі...
Цеста пакідаецца на гадзіну ў цёплым месцы, яно павінна вырасці прыблізна на 2/3. Затым робіцца абмінка і ізноў пакідаецца на гадзіну.
Апошні этам мне падабаецца больш за ўсё, вельмі прыемна фармаваць хлеб. Спачатку дзеліцца цеста на тры роўных кавалка. Затым з кожнага кавалку лепяцца круглякі. І цеста ізноў павінна адпачыць 20 хвілін. Але гэта мы гаворым, што яно нібы адпачывае, на самай справе яно працуе, яно расце...
І вось можна фармаваць буханачкі. І так прыемна шчоўкаюць пузырыкі пад рукамі, так гучна.
Цяпер хлеб павінен пастаяць 8-12 гадзін у лядоўні, так набіраецца смак і водар хлеба.
Затым трэба, каб хлеб падняўся. Таму ён павінен пастаяць яшчэ 1-4 гадзіны ў цяпле. Галоўнае, каб не перастаяў, таму што будзе вельмі кіслым.
Апошняе, што неабходна зрабіць, гэта надрэзы, дзякуючы якім у хлеба атрымаецца прыгожая скарынка.
Хлеб пячэцца вельмі хутка, хвілін 30-35 у папярэдне разагрэтай да 230 градусаў С духоўцы. Перад тым як паставіць хлеб пекчыся, неабходна папырскаць духоўку вадой. У мяне духоўка з параваркай, таму я проста наліваю 30-40 г вады. Ад гэтага скарынка атрымліваецца ня вельмі цвёрдай.
І вось ён, гаспадар стала...
У хлеба свая музыка, якая пачынаецца са шчоўкання пузырыкаў, а заканчваецца глухім гукам ад стуку па нізе буханкі. Так правяраецца гатоўнасць хлеба... І хруст, хруст абавязковы, таму што такі хлеб адразу ж хочацца пакаштаваць, а смачней за ўсё адламаць скарыначку :)
Смачнага летняга настрою :)
No comments:
Post a Comment