Уражанні за тыдзень :)

Вітаю-вітаю!

Знікла я на тыдзень з-за маленькіх падарожжаў і розных спраў. Але ёсць у мяне некалькі фотаздымкаў, якімі спяшаюся падзяліцца.

...

Першае, куды я накіравалася ў панядзелак, была вёска, дзе жывуць мае бацькі.

І вось такі прыгожы краявід адкрыўся мне...

Гадоў сем-восем таму, калі я вучылася ў школе, на гэтым месцы расла адна старая вярба. Прыгожая такая, з вялікімі і тоўстымі галінамі. Многія жыхары вёскі перад Вербніцай прыходзілі сюды і выразалі сабе маладыя галінкі вярбы, каб асвяціць у царкве. Але працаўнікі, якія адказваюць за рамонт дарог, вырашылі, што вярбу трэба знішчыць. І з гэтай справай яны вельмі добра справіліся - ад вярбы засталіся толькі трэскі.

Але тое, што вырасла на наступны год, вельмі ўразіла: замест адной вярбы вырасла цэлае мора маленькіх вербачак. І вось праз столькі год гэтыя вербачкі сустрэлі мяне ва ўсёй сваёй прыгажосці. Я была прыемна ўражана, убачыўшы такое...

Цяпер вярба расце з двух бакоў дарогі. Вельмі прыгожа!

...

Гэтым разам дарога падаравала мне шмат прыгажосці. Магчыма, гэта я шукала прыгажосць, стаміўшыся ад паўсядзённасці, але дарога была незвычайнай і прыемнай.

Залатая салома...

Знайшла яе каля Шчучына, але сфатаграфала толькі на зваротным баку, у аўторак. Збіраўся дождж, спахмурнела, але прапусціць такое было шкада, таму што па дарозе больш такой прыгажосці не сустрэла.

...

Буслы...

Сустрэла буслоў каля Ліды. Там трактары збіралі ўраджай, а буслы шукалі жаб. А я знайшла прыгожыя фотаздымкі.

Маладыя буслы...

Шкада, што было мала часу. Буслоў было вельмі шмат, было прыемна назіраць за імі. І можна было зрабіць шмат прыгожых фотаздымкаў...

...

Галубы з плошчы Я.Коласа ў Менску, серада.

Вельмі мне падабаецца карміць галубоў :) 

Як можна было зразумець з майго блогу, я ўвогуле вельмі люблю птушак. Птушкі - незвычайны цуд прыроды. Разнастайнасць здзіўляе!

...

А вось і мае птушачкі...

Прывяла курачка нам кураняткаў на мінулым тыдні, але сфатаграфаваць атрымалася толькі ў чацвер.

Чорныя чарнушкі...

...

І кветкі...

Мора кветак было на гэтым тыдні.

Вялікі букет нарэзала кветак кермек (стаціца), таму што стаяла спёка, а сёння чакалі дождж, і каб не сапсаваць гэтыя кветкі, трэба было тэрмінова іх сабраць. 

Так прыемна, так шмат кветак!

Зацвіла ружа "Пампанэла"...

Прыгожая назва, прыгожая кветка :)

І астры.

Шмат розных колераў гэтай прыгожай кветкі цвіце ў садку.

Стаўлю букеты, каб радавалі ў хаце...

Некалькі кветак, а настрой на ўвесь дзень добры.

Ну вось так неяк і жывем, а я пабегла адпачываць, таму што вельмі насычаны атрымаўся тыдзень. Нават аповед не магу пісаць, думкі не ідуць. Таму выбачайце :)

Цудоўнага адпачынку і добрага настрою:)