Ільняная сукенка (рыхтуюся да сехону Ч.3)

Вітаю!
На вуліцы яшчэ ня так цёпла, каб працаваць у агародзе. Таму рыхтуюся да вясенне-летняга сезону і шыю сабе вопратку.
Вось і сёння сшылася ў мяне сукеначка са льну.

Ідэя сукенкі з беларускай вышыўкай была ў мяне ў галаве даўно. Нават сукенку я раскройвала перад Новым годам (і памер тады быў большы, чым цяпер. У мяне часта так здараецца :)

Але сшылася яна толькі цяпер.

Што і як:

• лён 100%
• сіцец
• ніткі Coats Cotton
• ніткі Anchor

Я вельмі люблю вопратку са льну, люблю працаваць са льном. Але адзінае, што мне ня вельмі падабаецца, што лён вельмі хутка мнецца. І вось тут вельмі добра гэта бачна.

Нахілілася абуцца, і вось сукенка памялася.

Сукенка мае кішэні.

Працаваць з тканінай было вельмі прыемна. Вышаваць па льну, канешне, значна складанней, чым па канве. Але гэта таго каштуе. Атрымліваецца вельмі прыгожа!

Сукенка з падкладам. Яе можна і цяпер апранаць, думаю будзе ня вельмі халадно. І летам.

Увогуле лён вельмі прыемны да скуры. Самае тое для лета.

Шалік вязаны пруткамі (спіцамі). Нітачкі, як звычайна, King Cole. На гэты раз Galaxy DK 732.

Як я і пісала вышэй, памер сукенкі (40 па часопісу BURDA) быў абраны яшчэ перад НГ. І цяпер я стала крышачку "меньшай" :) І вось сукенку было бы добра таксама сшыць на памер меньш. Але ўжо была падрыхтавана тканіна і вышыўка. Прыйшлося шыць!

Торушка дапамагае :) Рыська быў у хаце, таму і не засвяціўся на гэты раз. У нас хатнія жыхары вельмі актыўныя і цікаўныя асобы :)

Тут трэба праверыць...

Тут трэба паляжаць...

"І галінку аддай! Яна на фотаздымку не патрэбная!"

Торушка пабег хаваць ад мяне сваю галінку. Можна і далей працягваць.

Вышыўка ўзята з кніг "Беларускі арнамент", "Беларускі народны касцюм".

Ніткі Anchor 167.

Назва "Узор жыцця" (ромб у цэнтры). Узор мае дзве часткі:

• ромб з адросткамі-прамянямі - сонца;
• такі ж ромб, але прамяні накіраваны ўнутр, - зямля.

 Сімвал сонца змяшчаецца ў сімвал зямлі, і ўзор выказвае ідэю росквіту прыроды, жыцця.

Дакладнае тлумачэнне зорак у кнізе я не знайшла. Адзінае, што магу сказаць, што падобныя зоркі з'яўляюцца сімвалам ураджаю.

Як выглядае спіна ў сукенцы.

Засцежка-маланка пад колер вышыўкі (молнія).

На торбе можна і пасядзець :)

Торба таксама са льну, але тут лён "грубы".

Мне падабаецца з такой торбай хадзіць на йогу. Шмат што змяшчаецца!

Вось як сукенка выглядала ў часопісе.

Часопіс BURDA 12/2013.

Сонечнага надвор'я :)