Усім прывітанне!
Сёння такі дзень, такі добры дзень, такі вельмі важны дзень у маім жыцці - Дзень Народзін маёй мамулі. І, канешне, яна з'яўляецца адным з галоўных чытачоў майго блогу, таму:
Мамулік, віншую :)
Жадаю Табе моцнага здароўя, усмешак, радасці!
Няхай кожны дзень пачынаецца з добрага настрою!
І хоць вельмі шкада, што сёння не атрымалася сустрэцца, за Тваё здароўе (як любіць казаць мой муж :) была з'едзена дыня і ажыны. А значыць здароўе будзе!
З Днём Народзін, мілая мая матуля...
І верш, які я памятаю яшчэ з дзіцячага садку...
Матуліны рукі
З маленства яны нас
Да сэрца гарнулі,
Пяшчотныя, добрыя
Рукі матулі,
Што з ранку працуюць
Няспынна і лоўка -
Дачушку накормяць,
Прычэшуць галоўку,
Кашулю пашыюць,
Правераць задачу
І сына суцешаць,
Калі той заплача.
Матуліны рукі
Нас цешаць, галубяць,
Так шчыра, як маці,
Ніхто нас не любіць.
Матуліны рукі -
Адзіныя ў свеце,
Шануйце, любіце
Заўсёды іх дзеці.
(Вера Вярба)
...
І як жа не паказаць, што было ў гэтым дні, акрамя свята :)
Дыня і ажыны...
Такая мядовая дыня трапіла сёння нам.
І вельмі салодкія ажыны, нават не чакала, што такія можна знайсці.
...
Свой хлеб.
Адзін хдеб спякла ржаны, другі пшанічна-ячменны з яблыкам і аўсянымі шматкамі.
Такі духмяны і смачны хлеб атрымаўся...
Вельмі люблю пекчы хлеб. Тады ў хаце такія водары, так утульна адразу становіцца...
...
І маленькая гісторыя.
Жыла на маёй кухні рукавічка. Жыла адна і вельмі сумавала. А для мяне яна была вельмі зручная, але колеры цёмныя, ня вельмі мне такія падабаюцца. З іншага боку было зручна такой цёмнай рукавічкай даставаць збанкі з печы...
І вось учора вырашыла я сшыць яшчэ адну такую рукавічку, толькі светлую. Паклала два пласты сінтэпону, каб было зручна карыстацца. Сцежка зроблена на машынцы.
Матэрыялы:
- тканіна лён 100%.
- Ніткі Coats Duet. (нітачкі можна набыць у нашай краме)
- Сінтэпон.
Але два пласты сінтэпону занадта для такой рукавіцы, таму...
Таму было вырашана сшыць яшчэ адну рукавічку.
Паклала адзін пласт сінтэпону. І вось гэта вельмі добра атрымалася. Рукавічка - мяккая, большага памеру.
Ну і я думаю, і навошна мне тры рукавічкі? Трэба чацвёртую, бо іначай ня зручна карыстацца...
Ну вось, цяпер усім весела і ўтульна на куханьцы, у кожнай рукавічкі з'явілася сяброўка.
І падумала я, што чатыры рукавічкі мне шмат.
Таму дзве застануцца ў мяне, а дзве паедуць у падарунак мамуліку.
Мамулік, віншую :)
Няхай святы ў Вашым доме не залежаць ад календароў!
Няхай свята заўжды будзе з Вамі!
Цудоўных выходных :)
No comments:
Post a Comment