Суп з пастарнакам і грыбамі

Вітаю!

З пераездам у горад гатаваць зусім не хочацца. Штосьці самае простае і прымітыўнае, каб не згаладацца :) Чаму так? З'явіліся другія справы, кухня ў кватэры больш цёмная, чым была ў хаце і г.д. Прычыны можна прыдумляць розныя і шмат, але сытым ад гэтага не станеш. І вось нешта шчоўкнула, як мне падабаецца гаварыць. І сталі нараджацца смачныя стравы.

Адна з іх - новы суп-пюрэ з пастарнакам і грыбамі.

Спалучэнні гародніны і зёлак незвычайныя, так як і смак, які атрымаўся ў выніку :)

Што і як:

- пастарнак - у мяне быў вялікі, 200-300 г, калі не больш;

- карэнне пятрушкі - 2 невялікія штучкі;

- цыбуля-шалот - 3 шт;

- морквіна - 1 вялікая;

- пару лісточкаў лаўра;

- чорны перац - 4-5 шт.

Усю гародніну пачысціць, памыць, парэзаць на кавалкі - неабавязкова маленькія. Заліць вадой. Я брала каструлю 2 л, клала туды гародніну і далівала вады так, каб пад час кіпення нічога не выкіпала. І ставіла варыць булён. Каля 45 хвілін.

Затым у кіпень засыпала сухія грыбы і пакінула на некалькі гадзін, каб грыбы настаяліся.

Пасля змалола ўсё блэндэрам. Паставіла варыцца. Тым часам пачысціла бульбу, парэзала на кавалкі як для супу, каб хутчэй зварылася, і закінула ў каструлю з гароднінай.

Як бульба зварылася - хвілін 20 - змалола блэндэрам.

Дадала  соль, мускатны гарэх, пару лісточкаў сушанага шалфею і пару галінак чабрацу - можна сказаць, што гэта на свой густ, але абавязкова, іначай смак супу будзе ня вельмі без зёлак, мякка кажучы :)

Затым асобна пасмажыла на аліўкавым алеі сухарыкі з сырам і адным зубчыкам часнаку.

Вельмі смачна атрымалася! Такі насычаны водарамі суп елі ўпершыню пасля супу з гарбуза і дзівіліся, што так можа быць смачна :) І вельмі ўтульна было і цёпла ў такія мокрыя апошнія дні восені...

Смачнай восені і цудоўнага настрою:)