Пахучая, вялікая, сапраўдная...
Сушаныя аранжыкі прыемна здзівілі. Нібы шкляныя. Так прыгожа выглядаюць!
Нават падарункі некаторыя прышлося падарыць, бо цярпення не хапіла бы ў мяне чакаць, калі іх прыйдзе час дарыць.
Заўтра і паслязаўтра выстаўленне адзнакі ў школе. Страаааааашна! Спадзяюся, усё пройдзе добра!
І вакацыі. Доўгачаканыя. Наплянавала столькі ўсяго смачнага. Хутчэй бы пачаць!
Такія справы!
Прыемнага тыдню і чароўнага настрою!
Дзень народзінаў ужо тыдзень таму скончыўся, а пішу толькі сёння. Бо калі яшчэ, як не ў хворым стане. Іначай часу няма. Практыкі, праца, хатнія справы...
Танцы нашыя скончыліся хутка, бо ездзіць пасля працы аўтобусам ці роварам было вельмі складана. І час мой на аповеды таксама скончыўся разам з імі. Але сёння пра дзень народзінаў.
Духмяныя ліліі мая любоў. Я памятаю ў дзяцінстве маме дарылі такія, бо ейны дзень народзін - гэта сезон лілій і гладыёлусаў ❤ Я бы тады не паверыла, што такое багацце можна атрымаць у падарунак таксама ў снежні. Так прыемна!
Торт быў шыкоўны. Падрыхтоўвала цэлы тыдзень. Гэта быў чызкейк "снікерс" з кнігі Вікі Мельнік "Чызкейк унутры". Ужо ня першы рэцэпт з ейных кніг і, як заўжды, вельмі смачна! Асабліва пасля дзевяцігадзіннай змены амаль у начы... Што можна лепшага пажадаць?!
Такі вось дзень народзінаў! Смачны і прыгожы. Гарманічны. Ніякіх чаканняў і крыўдаў, што яны не збыліся.... Напэўна, проста на гэта болей няма часу 🤭
Нават ялінка ў нас ужо была і сышла, бо хутка асыпалася. Чакаем Калядаў цяпер, каб новую ставіць.
Смачных тартоў і прыемных водараў вам у гэтым марозным снежні! ❄☃️⛄🌨🎄
У іншы дзень кажу дзіцю, трэба цыбулі пачысціць... І чысцілі мы разам і нават амаль без слёзкаў абышлося, што дзіва.
А ў горадзе ўжо ва ўсю чакаюцца Каляды. Цукерак навезена, цацкі з’явіліся... Такая прыгажосць, што хочацца ўсё скупіць, толькі елка такая ў хату ня змесціцца, на якую ўсе цацкі павесіць 😁
Вось такія справы!
А ў вас як справы, многа нечаканак заўважылі?
Кастрычнік прынес столькі новага! Новыя сустрэчы, новая праца, новыя ўражанні...
Хэлоўін і кексы, такія смачныя, з белай чакалядай. Нават гарбуз парэзалі. Думала, на суп пойдзе. Але ён зацвіў хутчэй, чым надышло гэтае свята. Вось думаю, елку заранёў купляць усё ж ня варта. Таксама не дастаіць...
Дзіця кухара ў пясочніцы таксама кухарыць. У лесе кухарыць. Просіць дастаць "інгрэдыенты" кожны раз, як сядае есці. Таму што нават бутэрброд гатуецца з "інгрэдыетаў". Ой, люблю не магу! І песню цяпер спяваем: Воран крача - сыру хоча😁 як тут не любіць (і не рагатаць, як конь)....
І вось усё гэта перамяшанае са стомленасцю і нейкай бессэнсоўнасцю. І я проста ня ведаю, што рабіць...
Светлага лістапада, якім бы цёмным ён не здаваўся!
Я тут такое "вынайшла" для сябе, аказваецца! Звычайна я проста скардзілася, як мне не хапае часу, а потым рашыла перастаць і пачаць неяк гэты час шукаць. І вось цяпер мы вышываем разам. Канешне, гэты чалавек малы хоча мне дапамагаць вышываць мой малюнак, а не сваю аднаразовую талерку з дзіркамі. Часам мы нават дамаўляемся, што кожны вышае сваё. Але не заўжды...
Цяпер я скарджуся, што спорту ў маім жыцці часам замнога😁
А ў вас якія скаргі?
Добрага тыдню і смачнага Хэлоўіну! Мы ўжо кексы-прывіды гатавалі ў школе. Такія смачныя👻
Добрага працоўнага тыдню і прыгажосці восені 🍁
